2016, ജൂലൈ 11, തിങ്കളാഴ്‌ച

ഒരു ജൂണ്‍ സ്മരണ

ജൂണ്‍ മാസത്തെ മഴയോടൊത്ത്
ചങ്ങാതീടെ തോളും ചാരി
ഒരേ കുടയില്‍ പള്ളിക്കൂടം
പോയ കാലം അവിസ്മരണീയം
ഇടവപ്പാതി കാറും കോളും
ജൂണില്‍ പെയ്യും കടിഞ്ഞൂല്‍ മഴയും
ഇടക്കിടെ വീശും കാറ്റും കുളിരും
തകര്‍ത്തു വെട്ടും ഇടിയും മിന്നലും
വകവയ്ക്കാതെ കുഞ്ഞോമനകള്‍
കുഞ്ഞിക്കുടയും ചൂടിച്ചൂടി
വഴിയോരങ്ങള്‍ ചേര്‍ന്നു ചേര്‍ന്ന്
പള്ളിക്കൂടം പോകും കാഴ്ചകള്‍
മനം കുളിര്‍ക്കെ കണ്ടു രസിക്കെ
സ്മരണകളെങ്ങോ വഴുതി മാറി
മനസ്സിനു പ്രായം കുറഞ്ഞുകുറഞ്ഞ്
ബാല്യം തേടി പോകുന്നുണ്ടേ
മൂത്തു നരച്ചു കഴിഞ്ഞെന്നാലും
വടിയും കുത്തി നടന്നെന്നാലും
ജൂണ്‍മാസത്തെ സ്മരണയ്‌ക്കെന്നും
അഞ്ചോ പത്തോ വയസ്സുകള്‍ മാത്രം
ഓര്‍ക്കുന്തോറും മധുരിമയേറും
മനസ്സിനുള്ളിലെ സുവര്‍ണ്ണകാലം
താലോലിച്ചു രസിക്കാനെന്നും
കാലം നല്‍കിയ നിധി തന്നെ.